Iliz ma farrouz

SALUD DEOC’H ILIZ VA FARROUZ 


Salud deoc’h Iliz va farrouz
Salud Iliz va zadou koz
Ma c’halon a zeu da dommañ

Iliz santel pa ho kwelañ  

Ma c’halon a zeu da dommañ
Ha ma daoulagad da ouelañ
P’ho kwelan Iliz venniget
Rak ennoc’h oun bet badezet.

Salud d’an tour ‘ zo war e benn
Kroaz hon Salver , sin ar c’hristen
‘ zo en e greiz o seniñ kleier
War bep ton hag e pep amzer. 

Din-me, devez ma badeziant
Kleier sakr, c’houi ‘ sone drant:
Ha pa zeuio devez ma maro 
C’houi din truezus a sono.

En amzer goz, ma c'hendadou
A leze ti ha labouriou,
Bep sul, bep gouel, evit diskuiz
Gant Jezuz aman en iliz.

Nag a wech ma mamm daoulinet, 
En iliz-man he deus pedet,
Pedet evit he bugale,
Skuilhet daerou war ar pave(z).

Aman ez oun bet divec'hiet
Gant ar beleg diouz ar pec'hed ;
Ouz an daol santel pebez joa !
'vidoun e deiz ma fask kenta.

Gwelout a ran tron ar Werc'hez.
Mamm hon ene, hon Rouanez ;
O, Mari c'houi oar, a-viskoaz,
'm eus bet 'vidoc'h Karantez vras.

Me wel, ivez, skeudenn ar sent,
A ro d'imp harp a-hed an hent ;
En ho zouez me wel hon Patron :
N'ankounain Het [sic, lenn: ket] e bardon !

N'em eus ket kavet e lec'h all,
Nag en Arvor, nag e Bro-C'hall,
D'am daoulagad ken dudius,
D'am c'halon ken karantezus !

Chom a rin betek ma maro,
Tost d'am iliz e-kreiz ma Bro :
Me fell d'in beza douaret, 
Gant ma zud-koz en hon bered !

Deiz ar Varn, gant Doue galvet,
E savimp eus hon bez sklaset,
Da vont eus iliz ar barroz
'Trezek iliz ar Baradoz.